#1120 Old Age | 我最喜愛的台慶 | Pat爺
除了台慶劇，其實近年台慶當晚播出嘅《萬千星輝慶賀台慶》都已經神勇不再，冇乜力水之餘兼欠吸引力。不時稱收視偏低，到底係其他娛樂節目太多，定係呢個節目娛樂成份太少？
要知道細個對於呢個年度節目，係存以一份待望之心。曾經有段時間，節目名為《龍鳳呈祥賀台慶》，會叫男女藝人分別練飛刀學跳樓去鬥一餐，谷收視。劉德華就曾經有年表演飛車，雖然飛得唔遠，但劉德華親身上陣喎，飛一米都好睇過人啦。
去到90年代，香港樂壇真正的百花齊放，歌星多到瀉，多到一個程度係有本事在台慶夜以外，搞多個《翡翠歌星賀台慶》節目。呢個仿倣「日本紅白歌唱大賽」嘅節目，目的就係俾男女歌星鬥番晚。
睇番當年演出，基本上同唱歌冇乜大關係，唔係鬥升key，就係邊做單桿邊唱歌，無無聊聊咁但又幾好睇。而且每次去廣告前都有串燒歌環節，以一個主題選曲人人唱兩句，由於音樂是重新編排，而且時間趕急又變晒奏，歌手們的甩嘴情況自然成為亮點。
既然大家都覺得好睇，今時今日照辦煮碗做番又得唔得呢？即係蕭正楠去飛車，許廷鏗同胡鴻鈞鬥升key……算啦，都係唔寫落去喇！
#1121 Old Age | 我最喜愛的台慶 | But
「火箭炮」、「平面方角」，是為了令你可盡情享受電視節目的聲畫音質；8、90年代，一部電視機可謂連繫着唔少香港家庭，打機係佢、睇帶（VHS）靠佢，看電視節目都係佢。一機多用，為電視機使用權爭崩頭繼而大打出手的情況時而易見。
同大佬打就話叫做有得搏，但若然媽子落晒order話要睇《萬千星輝賀台慶》，唔通出手打老母咁冇天理咩？是以我倆當然冇聲出，擔櫈仔，坐定定，咁見證了三十多個11月19日。
阿媽最愛看楊盼盼玩亡命特技，老豆愛看周潤發吞火、秋官踩單車行鋼線。本來以上幾個我都冇乜癮，然而去到90年代初開始識嘢睇星爺玩特異功能、劉華爆出「杏加橙」永恆經典，再有汪阿姐穿黑絲姣唱熱咖啡簡直去到決戰「止禁」之巔。
講到我最有印象的台慶演出，你上YouTube都睇得返，哩……就係87年時欣宜阿媽肥姐沈殿霞負重二百幾磅身驅以氣功踩8層雞蛋陣先叫震撼，咁都不特止，上完8層蛋陣後肥姐更以其身穿越呼拉圈而獲得六叔一笑，從而奠定無記永恆開心果地位。相比起近年荃加福祿壽騎呢玩轉台慶、黃祖藍台慶玩求婚都叫係台慶鉅獻，簡直不知所謂。（BUT）
